مكتوب

مكتوب

الدنيا كي الرحلة فيها برشا محطات تلقى فيها الي يبكيك و زادة الي يفرحك. تتعدى برشا مراحل لين يوصل بيك المكتوب للمحطّة الأخيرة...نجمو نكونو نحسوا نفس الوجيعة ولا نضحكوا نفس الضحكة لكن كل واحد فينا عندو حكايات مخبية في صندوق قديم نجبدوه و نتذكروا احلامنا الي دفناها فيه... من هنا خرجت احلامنا أحلام_بنات للمبدعة #صبرينه

#الحلقة_1 

الي مكتوب على الجبين لازم تراه العين انا بنية عشت مراهقتي كيما أي طفلة صحبت شخت كل واحد نصوحبو نحبو و نقول هذا باش نعرس بيه و نبدى نتفوخر قدام أصحابي و انا ما نعرفش الي هذاك يمسخ صمعة الطفلة ماخذة الدنيا ببساطة و ما كنتش نعرف العواقب شنية باش نكذب عليكم باش نقلكم ما بستش و ما عنقتش ... ههههه لا عملت كيما أي طفلة هذاك الصغر . نسيت ما عرفتكمش بروحي انا اسمي فاطمة يتربجو بيا يعطولي فطومة ... انا خبيرة تجميل عندي صالون و عمري 30 سنة . انا من الريف و عايلت بابا حزارين ما عندهمش لمرا الي تخدم أما حمدالله بابا و امي وقفو معانا و ضمنولنا مستقبلنا . انا سمرة مسرارة عنين كحل كبار حواجب على طبيعتهم خشان و مستوين خشم صغير و شفايف مليانين روز و غمازات زايدين فيا الشطر طويلة و ستيل و شعر ارتب حرير شتان و طويل... متسمية على ولد عمتي ملي انا صغيرة انا ماعمري ما حبيتو عمتي و بابا الله يهديهم ما فهمتش منين جابوها هالحكاية كيكبرنا و شافني عاملة بعمايلي و زيد دخلت نقرى معهد خاص قلي معادش يساعدني ياتبطل لقراية و تشد الدار يا كل واحد على روحو ههههه هذا واحد مالاربعين بالطبيعة ما وافقتوش و شديت في قرايتي على خاطر عارفة كان باش نبطل لقراية رأس مالي الخيشة و السطل . بكيت حاولت معاه حكيت مع عمتي شي عما و صمى و قلي هذا ربي تحتو لا تقراها حتى جا النهار جاتني صحبتي قتلي سمعت الي سامي خطب تضربت جيت واقفة عصى و ترشقت في قلبي تمنيت الأرض تبلعني و لا نسمع هالخبر هزيت التليفون و كلمتو علاش شعمتلك غدرت بيا مبعد ما سمعو الناس و شافونا مع بعضنا تقوم تمشي تخطب كيفاش عطاك قلبك تخليني شنوة السبب الي خلاك تبعد عليا ما كنتش نتصور يجي نهار و نسمع بالخبر هذا. ... انا نبكي بالشهقة يا ناري على روحي بابا باش يقلي بطل و شد الدار يا ربي اش باش نعمل والله لو كان يفرض عليا بابا نبطل إلا ما نهج و نخليهالهم

#الحلقة_2

الدنيا ضلامت في عيني هذا الكل و هو يسمع فيا و ساكت قتلو حل فمك و جاوب قلي كملت كلامك أيا الله عينك و علق . زدت تحمصت و شديت التليفون و لوحتو و بديت نعيط و نبكي برا يكب سعدك يا ولد لحرام الله لا تربحك و صحبتي تحمل و فيا و تقلي شيهمك فيه مازلت صغيرة و قدامك مستقبلك شد فيه بيديك و ساقيك كان باش تقعد التبع فيه هو تعرف حياتك كيفاش باش تتعدى . نهارتها مزالولي ساعتين فرنسية قلت انا باش ندخل نكسر راسي هزيت ساكي و روحت امي مالباب سألتني بنيتي شبيك روحت ياخي موش قلت تكمل لعشية قلتلها أي ما جاتش الأستاذة هاني روحت دخلت للبيت نبكي و نندب على سعدي بكيت غردت كيما حبيت غطيت وجهي بالمخدة باش امي ما تسمعنيش عنيا تنفخو بالبكاء نسمع في الباب يدق امي جات و جابتلي كأس تيزانة قتلي شفت وجهك تاعب قلت بالك جاتها الدورة قلتلها أي امي تاعبة شوية مسحتلي على راسي باستني و مشات مسكينة لميمة ما تحس بيك كان هي. خرجت و انا سكرت الباب بالمفتاح و قعدت النوح و نقول سعدي على روحي اش باش نحكي الدارنا واش باش نقول واش باش يقولو لعباد مدام ولد عمتها سيبها مدام درا شنوة شد عليها ...مجتمعنا القاصي قلت اكهو أنسى تو الرجال الي باش يجي يخطب تو يدورولو مخو جماعة الحوما هوما من غير حتى شي يكرهونا خاطر احنا العيلة الوحيدة القافزة في البلاصة هذيكا نهار الكل و هوما التقطيع و الترييش فينا و في جد بونا. قعدت حايرة في أمري تو انا لا يزي قبلت بيه و قلت ميسالش نحب بابا يرضى عليا تو بالك بعد العرس نولي نحبو زيد من فوق يحبني نشدلو الدار و نولي كالخديمة عندو في الحفرة الناتنة ... هزني النوم فقت على صوت امي فطومة لعشا حضر قوم تعشا . قلتلها باهي هاني جاية قمت نترهوج مالجوع و راسي ثقيل و يوجع فيا مشيت غسلت حالتي و دخلت نلقاهم الكل ملمومين عالطاولة بيني و بين روحي زعما ما سعموش بسامي هاو ما سألني حد حتى امي ضاهر ما فيبالهاش . الحاصيلو عقدنا تعشينا تليفون بابا نوقز قلي فطومة هات التليفون هزيت نلقى نومرو عمتي . وووو عليا ياشومي اش باش نعمل تو اكيد باش تقلو هز عليها التليفون . أهلا باختي شنية احوالك .... قتلو لباس اما راني متغششة. ... قلها ماهو لباس أشفما. . .....قتلو كلام ما يجيش في التاليفون غدوة نجي الدارنا و نحكيو ... هذا الكل و انا متصمبر قدامو نستنى فيه باش يقوم و يصرفقني نحس في روحي سخنت شادة البكاء بالسيف عارفة اش باش يقلي . أيا علق التليفون و قعد يسأل في امي زعما شبيها اختي متغششة امي ضربت في مخها ديراكت خزرتلي قامت زعما زعما تلم في الطاولة و غمزتني و عيطتلي براسها مشيت انا للكجينة خلطت عليا قرصتني قتلي اش من مصيبة عملتها مع ولد عمتك نعرفك راهو ما تجي من جرتك كان المصايب و انا كان الدموع تسكسك تقولش عليا عاملة عملة ولا كان انا الوحيدة باش نبطل من خطيبي قلتلها امي هاني باش نحكيلك لحكاية انا سامي عمري ما حبيتو و زيد راهو فرض عليا نشد الدار بربي يامي هذي بلاصة باش نقعد فيها حتى وجه ربي ما نشوفوش امي الي ما ينقضش روحو من هالبلاصة عبارة دفن روحو بالحياة نحكي و نبكي امي ولات تبكي معاية قتلي بنيتي زيد احكي معاه بالك تتفاهمو قلتلها امي سامي خطب راهو اش باش نحكي معاه مسكينة حلت فمها ماسكرت ووو يا بنيتي اش باش تقولو البوك تعرفو صعيب . قلتلها امي معنا ما نقولولو هذاكا الي كاتب . مشيت غميت على رأسي و رقدت مصاب نهار غدوة ما يطلعش . فقت الصباح على صوت اختي تغني و تلبس في حوايجها صحة ليها فرحانة . فطومة فطومة قوم ماكش ماشية تقرى هيا كان تحب نوصلك في ثنيتي . قلتلها برا على روحك انا نقرى مخر. حصيلو نسمع فيها خرجت و سكرت الباب . قمت تنهدت تنهيدة لا تفهمها وجيعة و لا تخمام كيفاش باش نخرج و نشوفو قدام منضري.. انا هكاكا التخمام يهز و يجيب و دخلت امي بصينية لفطور . يا أمي علاش تعب في روحك خليت راني جيت فطرت في الكوجينة. قتلي لا نعرفك فادة و ماكش قد بعضك قلت نهزلها قبل ما تخرج من غير فطور . أمي انا ليوم منيش ماشية نقرى خليني ما عنيش نشوف لعباد تو لخبر راهو شاع تو تبدأ السوءلات من صباح ربي . قتلي تحب نكلمو نحكي معاه. . أمي الراجل خذى قرارو و خطب انا باش نقعد نقرق بيه هذاك المكتوب ربي يوجهو خير. .. مسكينة سكتت و مشات. قعدت نهار كامل في البيت ما خرجتش . نسمع في صوت عمتي البرة دخلت سلمو عليها لقات بابا قاعد في الصالة سلمت عليه و قعدت بجنبو. قلها اشبيك ماكش قد بعضك و كشاكشك طالعة ؟؟؟؟. قتلو ستناني نرد النفس و نشرب شريبة ماء ... و انا هذا الكل ورا الباب موقفة وذنية و قلبي باش يخرج من بلاصتو خايفة من ردت فعل بابا . أيا سيدي بدات عمتي . سيدي تو احنا موش تفهمنا فطومة باش ناخذوها السامي ؟؟ قلها ايه و شنوة الي تبدل هاي الطفلة تقرى وقت تبداو حاضرين العرس قلولي ..(.و انا نغفص في دموعي و نبكي على سعدي الي تكب على صغر سني منا تكوي و منا تشوي .) قتلو اش من عرس يا سيدي سامي ولدي هز بوه خطبلو تو عندها نهارين انا قتلو امين بالله لا نمشي معاك و لا نرضى عليك خليت بنت خويا و باش تأخذ مرا أخرى .. قلها ما تقول هالكلام و علاش عمل هكا (و بدى يصيح) شبيه هذا موش مقدر حد علاه يعمل هكا باش يشمت فيا الناس و بنتي تقعدلي في الرقبة . قتلو هو قال الفطومة بطل لقراية و هي محبتش و قتلو ما نبطلش باش نكمل قرايتي ياخي هي ماي تقرى في معهد خاص لواه تكمل كي هي ماهيش قادة روحها في القراية .. قلها كيفاش هذا كلام تو الطفلة مازلت صغيرة تبطل قرايتها اش باش تقعد تعمل تي احنا قريناها في الخاص باش ما يضيعش مستقبلها أختها قرأت و نجحت و تو تخدم في البنك و هي نقصفولها عمرها على صغر سنها هاك تشوف لبلاصة الي نسكنو فيها الي ما ينقضش روحو كانو وليد يشد لفلاحة و كاني طفلة مالاها كان سطل و الخيشة ..... (اياه يا ربي حمدالله الي نقضتني و رتحتني مالهم الي كنت باش نطيح فيه) عمتي قتلو انا راني حكيت معاه و فهمتو الله غالب رقد و قام قلك فاطمة معادش حاشتي باها....

#الحلقة_3

بابا هز روحو و خرج و عمتي قالت مروحة امي شدتها قتلها اقعد تعشى بحذانا ياخي عمتي قالتلها والله ما النجم هادية بنتي جاية الليلة خليني نروح نطيب لعشا.... حصيلو مشات عمتي و جاتني امي اسمع بنيتي الي مكتوب على الجبين لازم تراه العين و رأس بنتي كانو مكتوبك تو يدور يدور و يرجعلك . قلتلها أي امي مكتوب و بيني و بينك يامي رتحت منو بابا الي كنت خايفة منو و على خاطرو هو وافقت عليه هاو جا في صفي و ما عطانيش تو نكمل قراتي و نخدم على روحي . أمي قتلي على راحتك بنيتي انا و بوك ديما نخممولكم في مستقبلكم ... أيا سيدي مشيت من غدوة نقرى و قلبي فرحان حاجة كانت لاسقة فيا و تنحات كملت عشت حياتي كيما لبنات الكل قراية نخرج مع اصحابي صحبت برشا شخت عشت مراهقتي كيما الناس الكل خذيت حريتي كاملة و معادش معدلة على حد نسمع كلام امي و بابا اكهو و الحومة عاد ما نحكيلكمش بنت فلان عملت بنت فلان خرجت حصيلو الصبر و برا ما يخليو حد في راحتو انا معادش يهمني تو قدامي كان قرايتي خاطر هذي آخر فرصة عندي ... وصلت للباك و بدينا في المراجعة الصحيحة متع الباك كنت نراجع ديما انا ووليد أسمو بشير على فكرة لبنات ما عنديش معاهم الزهر المهم كملنا عدينا الباك الحق متع ربي ما عديتش بالباهي حاولت اما الله غالب جا نهارت النتيجة نستناو ماصباح و عايلتنا ضربة ثنين و هوما يطلبو يسالو جات نصف نهار وصل ميساج contrôle بكيت و امي تحمل فيا الله غالب بنيتي ما عندكش الزهر .... و عموماتي كل مرة يجي واحد أيا وينو المبروك و امي تقلهم المرة الجاية انشالله ... مشيت سكرت على روحي في البيت و نبكي على الزهر الراقد الي عندي و منها نسكت روحي المهم عندي باك تو نلقى بيه حل و ما نقعدش فيها الحفرة.... تعداو الايامات و رجعو الكلهم يقراو و عقدت منيش عارفة اش باش نعمل ... قلتلها امي اكهو باش نمشي نشوف حتى في معمل خياطة معادش النجم نقعد قتلي برا و ربي يجيبك في الصواب . خرجت من غدوة نفركس على خدمة المعمل الي نمشيلو عندك صانعة خادمة قبل و انا منين ليا الصنعة كنت نقرى لا نعرف لا نبل لا نعل ما حب حد يقبلني جيت وتكيت عالحيط يا ربي اش باش نعمل تو الأبواب الكل تسكرت في وجهي انا هكاكا نتمتم وحدي والعساس جاني شوفي بنيتي نعطيك اقتراح بري تعلمي لخياطة و مبعد تو تولي على شكون تدللي... الحق جابلي فكرة و انا وقتها مخي محدود المهم نخرج مالبلاصة هذيكا روحت الأمي حكيتلها قتلي برا شوف وين يقريو الخياطة و برا اقرى مشيت لوجت و رسمت روحي و نهار الاثنين نبدى نقرى ... اش باش نقلكم واش باش نحكيلكم مشيت الجمعة لولى حسيت روحي منيش مرتاحة و نقرى في حاجة ماهيش غرامي قلت برا تو نستانس المهم الدار لا ... كملت الجمعة الثانية الحق شي ماهو داخل المخي وين بيها يا فطومة مستحيل تكمل هكا ... يا و الله أحوال سعدي عافس عليه تران أصل يا ذنوبي كان يقوم .. روحت امي معادش ضاربة فيها حتى ضربة راهو الشي موش داخل المخي قتلي تي شبيك يا فطومة لبلاصة الي تقصدها طلع فيها حكاية زيد حاول و ركز روحك تو تستانس... أمي حكاية زايدة والله راني حولت شي الخياطة موش غرامي . قتلي اكهو مالا شد الدار هاك ماك ناقصة شي...(احنا حمدالله مستورة عنا فلاحة و أراضي معناتها مانيش مستحقة لفلوس ) قلتلها أمي كا نشد الدار يا نقعد بايرة يا ناخذ واحد مكبوب سعدو من هالحفرة نهار يخدم و عشرة شادلي وجهي... راني يامي كينشوف عائشة اختي كيفاش بكرهبتها و تخدم نذوب أصل نقول انا شبيني مانيش كيفها ... مسكينة سخفتها امي عنقتني و قتلي و رأس بنتي ما تاخذ أعز راجل و تسكن في أحسن بلاصة قلتلها يامي ما نتصورش زهري معلق في شجرة عروقها ميتة... ضحكت و قتلي يا مفعوصة منين تجيب فيه هالكلام حتى انا شدني كريز متع ضحك قلت بالحق اشبيني انا فاقدة الأمل ... قلتلها امي تعرفش كيفاش برى اعمللنا فيها كويس تاي و ترف حلو و ايجا نعديو عشوية مع بعضنا نضحكو و مولاها ربي ... تعدات اك لعشية و تعداو معاها اشهرة و انا باقية على نفس النغمة كل يوم نفس لحكاية تتعاود و الخرجة بحسابها تجي باش تخرج وين ماشية و علاش واش عندك حتى الحمام يا بو قلب لازمني نشاور عليه و نستنى الموافقة... قعدت بيني و بين روحي يا فطومة وين ماشية راك سلمت جملا شوف أصحابك الي يقرى يقرى و الي يخدم يخدم و انت باش تدفن روحك بالحيا با ربي أقف معايا .... نهار كامل و انا شادة اكالبيسي و نلعب في الكارطة ولا شادة التلفزة نتفرج في مسلسل حتى جرد انترنت ما فماش فيها البلاصة المحنونة ... فما نهار نتفرج الصباح في التلفزة جابو برنامج متع تجميل قعدت نتفرج حسيت روحي متفاعلة معاه قلت يا فطومة هاو الافاريات ولا لوح قلو خياطة واش خص كان بابا يوافقلي و نمشي نقرى فيه. .. عيط الأمي .. أمي اجا تفرج شوف محلاهم لبنات ومزينهم شوف اك اليدين مرطبهم و ما سمحهم و اك الطلبليات ما نضفهم .....ااااااه يامي مصاب بابا يوافق وونمشي نقرى فيها و نولي نمكيج للعرايس .... قتلي أمممممم اسكتي اسكتي بلا ترهدين تو يخليك عيش بنتي هذا عالم موش عالمنا تعرفي عيلة بوك والله ما يكلونا حشيش و ريش .... و خلاتني و مشات .... زدت تأكدت الي انا زهري كلا على راسو ... قلت يا فطومة ما تسلميش فيها لحكاية هذي يلزمني نلقى طريقة نقنع بيها امي باش تكلم بابا ...يا سيدي احنا نجربو ماناش خاصرين شي ..... وليت كل يوم نفيق نغني الأمي غناية التكوين متع التجميل و امي تخليني و تخرج لين نهار شديتها من يدها .... امي تو يلزمك تسمعني .... انا حبيتو التكوين هذاكا ووليت نهار الكل و انا نخمم فيه عوني امي امان احكي مع بابا يفرحك راني فديت و تخنقت (وبديت نبكي) مسكينة ولات تسكت فيا و قتلي باهي برا غدوة لوج وين يعملوه التكوين هذا تو انا نحكي مع بوك .... يييييا بلحق عيشك ربي يفضلك ليا ... قمت من غدوة حضرت روحي و مشيت الوسط لبلاد و بديت نسأل نعتوني على سنتر مشيتلو دخلت حكيت مع المديرة تفاهمنا قتلي مرحبا بيك .. روحت الأمي عجاجة فرحانة باش نموت بالفرحة .... بستها من جبينها... امي لقيت السنتر الي باش نقرى فيه و تفاهمت مع المديرة

#الحلقة_4

نقرى عام و الشهر ب 200د .... قتلي وووو 200د عليه باش تطلعي طبيبة .... لا امي ماهو خاطر هذي خدمتها مطلوبة و شهريتها باهية و نجم نعمل مشروع وحدي ... قتلي نشوف مع بوك و نقلك ماك تعرف الكلمة لخرى عندو .... حصيلو جا بابا و انا في بيتي ما خرجتش نسمع في امي تحكيلو .... قلها اشنوة باش تعدي حياتها الكل و هي تقرى بالفلوس ... قلها يزي تو موش لازم منها الخدمة (بابا فد خاطر قراني بالفلوس و ما نجحتش) حصيلو انا كسمعت هكاكا شدتني الغصة و مشيت غميت على راسي و رقدت جات عائشة اختي تقيم فيا .. فطومة قوم شوف اللبسة الي شهريتها قمت تلقاها جايبة سيكان موش صاك ... قعدت توري فيا و انا قلبي يعصر عليا . في الآخر قتلي شنية رايك قلتلها صحة و رجعت غميت على راسي و نبكي .... جات امي فطومة تقوم الطيب معايا لعشاء هاو بوك جابلنا تريليا ماك تحبها ..... قلتلها ما عيني في شي و سكر الباب وراك ... قتلي باهي و كنقلك بوك وافق باش تمشي تقرى تقوم ولا ما تقومش .... تنطرت من فرشي لا عارفة نبكي لا نضحك .... بلحق وافق مانيش مصدقة يا.... حملتها و قلتلها هيا نمشيو نطيبو . تعدات اك الليلة الكلها أحلام نتخيل في روحي كيفاش انا استيتيسيان و كيفاش يلزمني و خزرت اليدي نلقاها شايحة تعيف و اك الضوافر عاد ...قمت دوشت و شديت روحي بالكاسا النبي مولاك خرجت حمرا كالطمطومة هههه.... بديت نقرى كملت عامي الكل تعدى جو موش نرمال تفرهدت عالخر تبدلت في لبستي في كلامي في مشيتي حصيلو وليت فينو اك اليدين ما سمحهم الضوافر طوال بالمنيكير ديما ماكياجي فينو و حلو شعري ديما مسيب هابط حرير وليت شي كبير يا عمري..... جا نهار الامتحان لكبير هزيت عائشة موديل عملتلها ماكياج فتوق نجحنا الناس الكل حمدالله ياربي .... قتلي امي أي تو هاك كملت مكش باش تبدى تحضر في مشروعك بوك سألني راهو ... قلتلها امي يلزمني نمشي نخدم في صالون الساعة باش نزيد نتعلم و تولي عندي تجربة باهية... بابا ما قبلش ملول اني نخدم تحت شكون و مبعد كفهمتو فهم ... مشيت دبرت خدمة هنا المصيبة لكبيرة زايد يا ولدي الي طايح في كدس دشيشة عمرو ما يطلع منو .... قتلكمشي راهي حفرة ناتنة ..... الخدمة تبدى م 9 نكمل 8 متع الليل و انا الوقت هذاك فاش باش نروح يا ناري لازم نلقى الصعوبات قدامي يا ربي فرج عليا.... روحت كالمغبونة وجهي اصفر عارفة موش باش تقوملي قايمة .. عرضتني امي هاك روحت لقيت خدمة قلتلها أي لقيت اما ديما مسكرة في وجهي موش عارفة إلى متى... قتلي شبيك ... قلتلها حدها 8 متع الليل .... قتلي وووو فاش باش تروح 8 متع الليل والله أنسى كان بوك يوافقلك المرة هاذي ... قلتلها نعرف ماهو الي برجو بالبصل يقعد في تركينة كالسطل ..... شدها كريز متع ضحك قتلي اجا اجا نحط لفطور و يعمل الله دليل جا بابا قتلو امي على كل شي و انا حاضرة قلي برا عدي البرمي و تو ناخذلك كرهبة .... فرحت أيا هاي بدأت تسهال . بديت نعدي في البرمي المرة الأولى المرة الثانية المرة الثالثة و شي ما خذيتوش انا مشكلتي نخاف برشا .... قلت اكهو فديت معادش معديتو .....عندي خويا كاري في وسط لبلاد هو و أولاد يقري هو في الجامعة ... شديت بابا قتلو كلم شوقي يخرج لولاد و نمشي معاه انا حتى عائشة اختي توليلها قريبة زاد ... قحرلي و سكت ضاهر موش موافق . و انا دايا و شوايا لبلاصة هذيك نحسها منحسة عليا حاسة الي انا باش نقعد بايرة هههه .... و انا ما نعرفش الي كاتبهولي ربي باش يصيرلي موش كنبدا في بير غارق ... يا سيدك نعدات جمعة جا شوقي يدكك عليا وينو هالمشروع متاعك قتلو مزال موش تو حتى لين نعمل خبرة الساعة ... ضحك و قلي برا دور على نسا الحومة تعلم فيهم .... قحرتلو و قتلو صحيتك و مشيت..ياخي بابا جبدلو الموضوع قلو لم اخوتك لبنات معاك فطومة الخدمة الي لقاتها يكملو الخدمة مخر و ما عندهاش فاش تروح هانم معاك وليدي نتهنى عليهم و احنا هانو ساعة ساعة نجيو نطلو عليكم. ... قلو باهي بابا يعمل الله (خويا هذا يسمع كلام بابا ) حصيلو ما نوصفلكمش الفرحة الي عندي و اخيرا باش نبدى نخدم و زيد في البلاد ... أيا سيدك لمينا دبشنا انا و اختي و امي تنوح يا بناياتي شكون باش يونسني و كيفاش باش يجيني النوم و انتوما ماكمش راقدين في بيتكم .... و انا نسكت فيها امي افرح لبنيتك باش تخرج من هالبلاصة و تشوف ناس جدد .. قتلي برا انشالله ربي يفتحها في وجهك ... و خرجنا الصباح بكري هبطتني اختي في الدار و تعدات تخدم و انا قعدت انضم فيها نلقى شوقي غادي ... حصيلو بديت نخدم في السنتر ملول كنت خايفة مالكليونات و مبعد خذيت الهف وليت نعبر و لاو عندي برشا كليونات .... شايخة مع خدمتي عاملة عليها جو هذا غرامي و حققتو مزال الراجل تو هههههههه ... كالعادة قاعدة نفركس على فارس أحلامي الي نصوحبو نقول هذا باش نعرس بيه في اللخر يخسر عليا اكا الجملة الشهيرة ( يلزم كل واحد يمشي على روحو انا وياك ما تفاهمناش هههه) فتكم بالحديث عنا مرا تنضف في السنتر تجي كل يوم هي مسكينة زوالية قلولي لبنات راهي تقرى الكف قلت برى نجرب نشوف سعدي قام ولا مزال يجبد في النوم عطيتها اك الدينار و شافتلي قتلي انت سعدك قوي و باش تعيش في الخارج .... شدني الضحك قلتلها يا بنتي بالك غالطة فيا هههههه... قتلي لا انت باش تعيش في الخارج ... قلتلها انشالله من فمك الربي .... و في قلبي قلت هذي مرا تخرف انا وجهي وجه خارج ... حصيلو عديت عام خدمة عرفتي فرحانة بيا خاطر ندخللها في برشا فلوس و السخطة ماهيش تعطي فيا في حقي خاطر انا سكتة قلت برا بركة المهم نخدم و ما نشدش الدار ... ماني قلتلكم عندي ارديناتور بيروتيك هو متع العايلة أما جبناه معانا الدار لكرا وليت شريت فلاش انترنيت ... و بديت نشاطي و نباطي عاد والله هالخدمة قداش مبروكة عليا.... هانو ساعة ساعة دارنا يجيو يطلو علينا ... انا في عالم آخر خرجات شيخات اما الحق كان في النهار .... في الليل ديما شادة الدار .... هكاكا حتى لين جا نهار السعد هههه. عندي خالي يعيش في سويسرا مرتو ولدت جابت وليد ياخي انا عملتلها كمنتار "انشالله مبروك و يتربى في عزكم"

#الحلقة_5

و قعدت نقرى في الكمنتارات لخرين نلقى واحد اسمو ساجد دخلتلو للبروفيل و بعثتلو دعوة صداقة و صدقوني لا شفت تصاورو لا نعرف وين يسكن ما شفت شي هاكاكا هزتني يدي نزلت عالبروفيل متاع. .. كنقلكم المكتوب حضر ما تصدقونيش .... برا يا سيدك مشات اشهرة و جاو اشهرة و انا نسيتو جملة .... نهار انا نخدم و نلقى ميساج في الفيسبوك... خالي بعثلي ميساج بالفرنسية ..... وقتها انا عندي كليونت حليت اكالميساج دوبا قريت و شفت اسم ساجد تفكرت ... قلت ووو عليا ضاهر فيه طلع يعرف خالي .... رجعتلو ميساج قتلو خالي سامحني راني ما نعرفش كيفاش بعثتلو دعوة ... قلي ما فهمتنيش راهو السيد صاحبي متربي و ولد عايلة و يلوج في طفلة باهية و بنت عايلة .... قلي ما تكلموش حتى يكلمك هو .... نقرى و منيش مصدقة هذا خالي يحكي معايا انا ولا انا نحلم ههههه.... قتلو باهي.... و هو نهارتها الصباح لقيتو قبل دعوتي و فيسع فسخ. ... أكهو عاد الفرحة باش تخرج من عيني قلت يا فطومة زعما زهاتلك الدنيا و لقيت مكتوبك و زيد يعيش في الخارج..... أمي باش تقلي سعدي ببنيتي مروحتلي لسويسرا ههههه.... انا نتمتم اكاكا وحدي و بعد قلت اسكت اسكت تو يطلع كيغيرو .... الحاصل كملت الخدمة و روحت تعشيت و حليت شوية الفيسبوك لقيتو عاود بعثلي دعوة أيا ما كنتش مالعاكسين و قبلت. .. بدينا نحكيو هو حليلتو طويل كيما نحب انا شعر أكحل لحية قصيرة كحلة توت زايدة فيه الشطر موش سمين و موش ضعيف. ... أكهو حكينا شوي تعرفنا على بعضنا و انا مالفرحة نسيت نسيت الي انا ما تعشيتش ....

#الحلقة_6

قتلو سامحني باش نقص عليك تو نرجعلك باش نمشي نتعشى. .. قلي اوكي خوذ راحتك.. مشيت تعشيت و النوم يكبي فيا مالتعب نهارتها خدمت برشا .... مبعد لعشا ديراكت رقدت و نسيت الراجل الي قتلو باش نرجعلك قمت الصباح نزرب معادش عليا وقت... مشيت للسنتر وصلت ريقلت اموري ... عملت طلة عالفيسبوك لقيتو باعثلي مساج ... صباح الخير يا مولات الكلمة .... وقتها تفكرتو ووو يعطيني سخطة شبيني نسيتو الزح ضهرت قدامو ما عنديش كلمة .... رجعتلو قتلو سامحني والله لعضيم تاعبة عاللخر هزني النوم.... كملنا حكينا شوية قلي نجم نشوفك الليلة في السكايب ... قتلو في الليل ما نجمش خويا يبدى موجود في الدار كان تنجم الصباح بكري ... قلي باهي تفاهمنا .... الحاصل كملت اكنهار و فقت من غدوة الصباح بكري خزرت الروحي في المراية شعري مطعطش و عنيا منفوخين بالنوم قلت انا الراجل باش نقابلو هكا اول مرة باش يشوفني تو يهرب هههه... مشيت مكيجت شوية ركحت روحي و حليت السكايب. .. شافني و شفتو هو حاشم و انا لا حبيت نسكت تقول بالعة مسجلة هههه.... تلفتت نلقى الوقت مشى ووو عليا سامحني ساجد يلزمني نمشي ماعادش عليا وقت ..... قمت نجري حتى الفطور ما فطرتوش مشيت بشري .... نلقاه باعثلي مساج . "محلاك" هههههه قريت اكالميساج فرحت و في نفس الوقت عندي إحساس الي هو باش يطلع كي زملاءو ... اكهو و بدى المشوار من هاك الكلمة ولى حب و غرام هو تعلق بيا برشا و انا زادا ..... هذا الكل سكايب اكهو مزالت المقابلة .... ولينا على نار نستناو وقتاه نشوفو بعضنا.. .. كنا يوميا الصباح بكري نحكيو ... و ما حكيت الحد عليه قلت خلي كل شي بستر ربي..... اكهو عاد جاء اليوم الموعود ... قلي اسمع يا بنت الناس انا راني مانيش ولد حرام باش نلعب بيك نحب نهبط التونس في أقرب وقت نشوفك و انجي نخطبك. ... و انا عاد لساني تلكون ما لقيت ما نقول ...قتلو في العقل خلينا نزيدو نتعرفو على بعضنا .... هذاك حد نيتي أنا كالبوهالية باقي موش جاد عليا ههههه.... حصيلو سكرنا اكالموضوع و ما عاودش جبدهولي. ... قلت يا فطومة يا فرخة اقعدي تو هكاكا فيعوض ما نقلو أي اجا مرحبا قتلو خلي في العقل هاني خسرتو تو انا عبد.... ما صدق الربي واحد حل فمو و تكلم عالخطبة. ... حصيلو بعد شهرين قد قد ... وراني التسكرة الي هو باش يجي يقعد جمعة ... ووو قداش فرحت و أخيرا باش نشوفو. .. تعداو اكااشهرين و من غدوة طيارتو قلي تجيني للمطار قتلو باهي ... قمت الصباح ركحت روحي لبست سروال دجين و بودي إ بلوزون كوير بنية. .. و مكياج خفيف طلعت قطوسة ههههه. خرجت وقفت تاكسي و طول الطريق و انا قلبي دقداقة باش يخرج من بلاصتو إحساس عمري ولا حسيتو مانيش مصدقة ضربة ثنين و انا نشوف في روحي في المراية و ضرنتو التكسيستي مركز ههه قلي مزيانة تباركاالله عليك... حشمت هبطت راسي. ... الحاصلو وصلت للمطار و أول مرة نمشيلو محلاه كبير و تضيع فيه ما عرفتش منين يخرجو المسافرين. .... ياخي طلعت الفوق و بقيت نستنى الحق ما شفتش عباد خارجين الكلهم داخلين هههه.. ياشومك يا فطومة باش تتهنتلي ليوم .. نتلفت عاليمين و عاليسار نلقاشي واحد يتصهمم قاعد وحدو خليني نسالو باش ما يضحكش عليا أيا يا سيدي سألت مرا قتلي موش هنا الي يجيو مالطيارات لوطة الحق هبطتني و وراتني في التلفزة معلقة الفوق قتلي اهوكم اوقات الطيارات .... مشيت نلقاها طيارتو مازالت ربع ساعة و تهبط. .. عاد قاعدة نستنى و نشوف في العباد خارجين و ملاهم عارضينهم يسلمو عليهم قلت في قلبي زعما يا فطومة تولي كيفهم و عايلتك يعرضوك هكا .. انا هكاكا نتفرج في خلق ربي.. و تعداو زوز أولاد ليبية قلي واحد محلاك الله و أحد عليك بالله باش نسألك انت ليبية؟ قحرتلو و قتلو لا تونسية .. قلي خاطر زينك زين ليبي .. ضحكتلو ضحكة صفراء و في قلبي برا يكب سعدك قلو ليبية ... أيا تلفت للتلفزة نلقى طيارتو هبطت وقفت مع الواقفين بديت نرعش و الساخنة 50ههه وجهي حمار و انا اكالمراية ماخطاتنيش ... انا هكاكا نلوج بعينيا في واحد طويل و هو خرج هههههه هنا الضحك .... مشيتلو نجري نعنق فيه كما شفت الناس كينو خويا ولا ولد عمي هههه و نسيت الي انا اول مرة نشوفو مني ليه... هو يضحك و يقلي الناس تخزر ههههه... حشمت على روحي ووو عليا شبيني انا نتصرف هكا ... أيا خرجنا نلقاو الكرهبا تستتى فينا ولد خوه جابلو كرهبتو هو عاملها RS قلي وين تحب نمشيو قتلو وين تحب انت مشينا للنصر عملنا قهوة و قعدنا نحكيو محلاه ياسر مضخم في لبستو في كلامو في بارفانتو هو يحكي و انا نتأمل في شفايفو. .... قلي راك عجبتني برشا ضهرتلي خير مسكايب ... فرحت برشا حاولت نرزن روحي باش ما نضهرش مفرفطة .... كملنا القهوة و وصلني قدام الدار ستار ربي خويا مزال ما روحش ... عطاني برشا صيكان قلي هاذم ليك .... قتلو عيشك دخلت نجري للدار ديراكت حليتهم بارفان و كبوط يهبل و شيميزات و سبادري و كدس شكلاطة ما صبرتش حليت الشكلاطة كليت فرغت قلبي بنينة موش نرمال ... لبست الكبوط نقيس فيه دخلت يدي للمكاتب نلقي ورقة مكتوب فيها تقبل نجي نخطبك نهار الجمعة الجاية .. و من هكا نلقى باكو حليتو نلقى خاتم ذهب ابيض يقتل..يقتل..يقتل راهو يفتق الخاتم مو عادي عنيا دمعو و ما نبش مصدقة طلبتو بالوقت و انا نبكي مالفرحة نا تكلمت حتى كلمة قلي تقبل ولا .... قتلو أي .... قلي ملا كلم داركم يحضرو رواحهم .... اكهو عاد بايتة في سنا أخرى نتخيل و نتمتم وحدي زعما سعدي وقف هاو طلع كلام اكا لمرا صحيح و انا الحق ما نمنش باهم غير جربت و برا و صدفت لحكاية كيف كيف... طار عليا النوم نستتى في النهار يطلع بدقيقة والدرج باش تكلم امي نبشرها.... أيا سيدي تعدات ليلة الكلها تخمام و انا نقيس في هاك الخاتم والدرج نعاود مواتيلي يدي شي كبير خصارة جاني كبير شوية أما موش مشكلة نلقالو حل... طلع النهار عالصباح كلمت امي تفجعت موش مستانسة نكلمها وقتها ... أمي صباح الخير.... صباح الخير فطومة شبيك لباس ... قلتلها لباس ما تتفجعش اسمع يامي حضرو رواحكم فما شكون باش يجي يخطبني نهار الجمعة.....

#الحلقة_7

اي قلو يجي نتعرفو عليه الساعة و بعد يعمل الخطبة. .. أمي فبالها الراجل باش يقعد ماشي جاي ... قلتلها أمي الراجل راهو جاء التونس بجمعة و راجع لبلادو .... قتلي يافطومة راني ما فهمت شي ياخي باش تاخذي قاوري ... قلتلها لا يامي راهو تونسي أما يعيش في سويسرا و صاحب خالي.... قتلي يزي يزي بلا تزعبين تو طالبتني هالصباح باش تفركيهم عليا... قلتلها أمي والله نحكي بالرسمي .... قتلي اسمع هانا جاينكم الليلة و فهميني قلتلها باهي... حصيلو كالعادة مشيت نخدم و ساجد طلبني قلي نجيك نمشيو نعملو قهوة ... قتلو لحضة نكلم عرفتي و نقلك .... كلمتها قلتلها باش نخرج عندي ما نعمل .... قتلي لا وين خارجة والخدمة لشكون ما فماش شكون يعوضك ... السخطة ما خلاتنيش بنت أمها واالله و انا حصلت و مشيت ما نجمش نفصع اما و رأس أمها بقية الجمعة لا تشوف منضري و خلي الطردني الراجل و دبرتو و يعيش في الخارج زادا تو ما عندي مناش خايفة .... كلمتو قتلو ما نجمش ايجاني لعشية .. قلي باهي .... حصيلو عديت اكالنهار على اعصابي كيفاش هو في تونس و أما مانيش معاه نندب في الخدمة... جات لعشية قلي ايا وين تحب نمشيو ؟؟؟يمتحن فيا فيبالو باش نقلو نمشيو نصهرو ... دويو راني ذيبة عليه ... قتلو وصلني ما نجمش نخرج معاك والله خويا ما يقتلني.... قلي خطيبتي راك... قتلو حتى تجي تخطب و مبعد يعمل الله... قلي باهي على كيفك أما باش نقعد كان نوصل فيك ؟ راني نحب نقعد معاك وقت طويل ...قتلو باهي غدوة نعديو النهار مع بعضنا .... قلي باهي مشات معاك..... تعداو اكالايامات يهبلو و عرفتي كلات روحها بالتليفونات ..... جات نهارت الجمعة دارنا حضرو رواحهم و انا زادا لبست و زينت قتلي امي طلعت كالعروسة امي حضرت عشاء و حلو و عصير و تاي بالبندق اكهو جاو الجماعة و انا نطل من شباك بيتي و شفتو هو يا وخيتي محلاه و ما شبو نخزر و نصلي عالنبي هاز و اكا باكو الورد في يدو ما أكبر. ... دخلو و قعدت ريحة البارفان متاعو فالكلوار و انا نشم و قلبي باش يطير بالفرحة والله يا فطومة سعدك قوي .... انا ما خرجتش من بيتي جملة و هو جماعتو يستناو فيا باش يشوفوني ... الرجال مشاو يصليو في المغرب و قعدو كان النساء و امي جاتني أيا اجا عاد حماتك تحب تشوفك ... خرجت نترشق و البارفان الي جابهالي هو تضرب تصرع. ... دخلت للصالة و حماتي تخزر و تصلي عنبي .... يا للا على كنتي زين و عين و انا الحشمة كلاتني سلمت عليهم الكل و مشيت نجيب في العصير و الحلو انا و عائشة ... انا هزيت طبق العصير يا ميمتي مرزنو و عائشة قتلي انت باش تهز هذاك باش تقلبو في حجر حماتك هههههه قتلي هات هنا تو نهزو انا و انت هز لحلو اكهو دخلنا نلقاو الرجال جاو يا ميمتي ذبت قدام بابا و دخلت بعضي في عوض ما نتبع عائشة لا هي في شيرة و انا في شيرة ههههه.... و بعد جابو خبزت القاتو تباركالله كبيرة توكل عرش .... جا وقت تلبيس الخاتم لبسني عملنا تصيورات و زغاريت تشرقع. .. عاد فتكم بالحديث هذا الكل صار و بابا قال الساجد انا ما نجمش نوافق تو إلا ما نسأل عليك و هو فرحان و ماد و جهو في التصاور و كانك من امي تعزيها تقبل لعزاء قتلي بنيتي راكي ما جربتيش الغربة. .... قلتلها أمي انا ماخذتو ماخذتو موش كيتبدى بلاصة منفية ههههه

#الحلقة_8

تعدات اكالليلة محلاها بت فيها أسعد وحدة في الدنيا .... جاني ساجد من غدوة خرجنا عملنا جو قلي فطومتي انت مليتلي حياتي محلاك و محلا داركم ... قلي كلمة بهتني فيها. .. قلي تعرف كنت جاي نخطب ساق القدام و عشرة التالي ... قتلو علاه؟؟... قلي كنت خايف من داركم كيفاش باش يطلعو كنت خايف لانلقى الكلمة لولى و لخرى عند أمك و بوك ما عندو في السوق ما يذوق كيما برشا عايلات ... هههه شدني الضحك ... قلي تسمع بيه المثل الي يقلك "اقلب التنجرة على فمها تطلع الطفلة الامها" انشالله تطلع انت كيف أمك بصراحة أمك ناس ملاح برشا .... قتلو أيا باهي و تو فرحان ؟؟ قلي مالا لا عندي أغلى جوهرة في يدي يلزمني نستحفظ عليها ... بصراحة عجبني برشا كيفاش يحكي رجوليتو سابقتو بلحق كي تقول راجل هذا راجل بالفم والملا .... قلي اسمع فطومتي انا راني ما نرجع كان ما ناخذ الموافقة من عند بوك.... قتلو تهنى حتى لو كان ما وافقش انا ما نسلمش فيك..... تعدى النهار محلاه حوسنا شخنا عديناه بين سوسة و الحمامات و سجودي الفرحة طايرة من عينيه و في نفس الوقت فادد خاطر مزالو نهار و يروح.... روحنا لعشية وصلني قدام الدار قلي باش نتوحشك برشا قتلو و انا زادا.... كلمت امي نسأل عليها اول ما هزت عليا باش تموت مضحك قتلي يا فطومة كان نحكيلك على جماعت الحومة اشقالو. ... قلتها اشقالو.... قتلي انا ليوم مشيت للعطار و هوما باركولي و زيد ماك تعرف التنسنيس هههه يسالو فيا بالحق فطومة خذات راجل قاوري ههههه. ....شدني الضحك قلتلها خليهم مساكن هذيك حد نيتهم خلي يشوفو بعينيهم و يموتو بقلوبهم ..... حقها امي الليلة ساجد باش يجي يسهر يحذانا خاطر غدوة مروح ... قتلي أي مرحبا بيه...

#الحلقة_9

عدينا نهارا يهبل شيخني سجودة مالكة و محواس و لعشية روح بيا الدار لكرا... هو فادد عالليخر خاطر باش يرجع ..... تعداتلي عائشة روحت معاها باش تعاون امي و ساجد جا في الليل ... سهرنا تعشينا و هو سهرية كاملة و عنيه ما هبطتش عليا و انا قلبي يوجع فيا ستانست بيه والله ... شرب كأس تاي و قام ... اكهو انا يلزمني نمشي تو طيارتي صباح بكري ... يقول فيها بسيف ما عينوش باش يروح عنيه فيها حزن و فرح و انا نقول مصاب الليل يزيد يطوال ما شبعتش منو. ... اكهو خرج و خرجو معاه امي و بابا انا سلمت عليه الداخل و اكهو خاطر بابا خارج معاه ... حدي حد الفيراندة نسمع فيهم يقولولو ريقل أمورك و اجا اكتب صداق اكهو و تريقل أوراقها هي و عرسو و هزها و امشيو انا ما نقبلش بنتي في بلاصة و راجلها في بلاصة ..... وقتها ساجد رجعت فيه الروح هههه .... سلم عليهم و عيط الخويا الصغير عطاه فلوس قلو اعطيهم الفطومة .... مسكين ماشي و قلبو معايا. ... خدم كرهبتو و مشا و هزلي قلبي معاه ... مخيبها اكالليلة عكس الليالي لخرين .... حطيت راسي عالمخدة هزني النوم ديراكت مالتعب. ... صبحت عالصباح في الخدمة و التوبيخ عاد نلقى عرفتي في وجهي. .. وينك للا جمعة كاملة ما ضهرتش ياخي حمام هو تدخل كيما تحب و تخرج كيما تحب...... سامحني اما راني كنت مريضة و هاني جبتلك شهادة طبية. ... علاه انت موضفة عندي ؟؟ ما نقبلش الشهادة الطبية .... هههه نسيت الي انا نخدم تحت الحيط لا تصب علينا و لاني مرسمة ... قلتلها شوف كان ماعدش يساعدك النجم نهز صاكي ونمشي راهو .... قتلي ملا حنك الباب ... و انا ما كنتش مالعاكسين رجعت مالثنية الي جابتني بطبيعتي انا فادة علخر و ما عنيش باش نخدم. ... روحت الدارنا نلقى امي تنضف في الدار حكيتلها لحكاية ... ياخي قتلي اكهو انت ضمنتي على الرويجل قلتي باش نمد ساقيه تو هههههه.... ضربت اك الجمعة في الدار كل ليلة انا سجودة في السكايب ... كي سمع بيا بطلت قلي بيني و بينك فرحت كي انت بطلت نحبك تقعد بحذا أمك حتى نجي انا نهزك .... ياخي انا قعدت مستغربة قتلو ما تقليش مالا ماكش ناوي تخليني نخدم في سويسرا قلي بالطبيعة هذي ماهيش تونس تخدم مع نساء اكهو لهنا السناتر الكل مخلطين رجال و نساء و انت ماكش باش تستحق تخدم انا نوفرلك كل شي .... قلت يا فطومة با بنت الكلب اشبيه الي يطيح بيك كان الحزار و خوه معناها انا مكتوبلي نشد الدار .... قلت مسالش سويسرا موش كيما تونس ما نتصورش نقلق فيها ... و انا مانيش عارفة شنوة يستنى فيا ..... نهار فقت على التليفون ينوقز هزيت نلقى عرفتي ... ووو شبيها هاذي عالصباح ما هزيتش عليها. ... قمت فطرت انا و امي و حطيت النظف في الدار و نسمع في كرهبا تزمر البرة. .. خرجت نطل .... تي هاي عرفتي هذي كيفاش طلعت دارنا الهم هذي ما تحير في شي حتى بلاصة في آخر الدنيا طلعتها .... عرضتها امي سلمت عليها دخلتها للدار ... و انا فصعت.... سألتها عليا قلتلها امي والله ما نعرف تو نطلبها نشوفها وين ... طلبتني و انا في دار عمي ..هزيت عليها .. وينك يا فرخة لمرا تسأل عليك. ... قلتلها لواه جاية بعد ما سمعتي وسخ وذنية و طردتني امي بلفطها بكلمتين تو تقلب منضرها .... قتلي اسمعيني ما تخلينيش في العراضة إيجي احكي معاها و فضي مشكلتك... باهي باهي هاني جاية. .... مشيت نلقاها متصدرة في الصالة و تاكل في سلاطة مشوية و خبز طابونة .... اللطف ديما تاكل شخلاها هي باب ما يدخلهاش. ... سلمت عليها قتلي شبيك ما رجعتش تخدم .... قلتلها ماك طردتني نسيت روحك .... (نحكي بعشرا وافي) أي ما هو اطلب السماح و ارجع أخدم على روحك .... و أنا نتمتم ياخي تستبله فيا لمرا و لا شنية حكايته. ... قتلي أيا من غدوة نحبك تصبح في الخدمة و انا لقيتها فرصة عاد قدام امي... انا ما نرجع نخدم كان ما تزيدني في الشهرية يا الزحي نخلص انا و الحجامة قد قد شوف فلان و فلان قداش يخلصو في الاستيتيسيانات متاعهم .... قصت عالماكلة و قتلي باهي ... تقول فيها و هي مرخوفة هههه... إياه ضربت ضربتي ... قلتلها نحب 450د ر باقي ما شرطش عليك برشا مسالش .... ههههه عينيها ترشقت فيا اللطف الجوع و هي الدخل في الملاين مني انا اكهو. .... هزت صاكها حسيتها كان زادت طولت باش يضربها الدم ... قتلي باهي غدوة تجي.... عرفتها صبعها تحت الزرصة هههه ...

#الحلقة_10

أيا سيدي رجعت نخدم و يا ليتني ما رجعت ضرنتها بنت لحرام رجعتني باش تبهذل بحالي .... دوبة دخلت للسنتر نلقا لبنات الحجامات الزوز شدين السطل و الخيشة و ينضفو و العرفة حاطة يداها في نصها و تتشيف عليهم قلت صباح الخير و تعديت باش نلبس حوايج الخدمة و مافيباليش الي انا باش نولي نخدم كل شي مني استيتيسيان ومني النضف السنتر ... كملت ركحت اموري و مشيت النظف في الماتريال .... و نسمع كان في العياط هي تحكي عليا. ... اش تحساب في روحها هي تجي تنظف كيما الناس الكل .... ضربت الباب بالقوي و مشاكشها طالعة و قتلي أيا للا السطل و الخيشة و نظف بيتك الي تخدم فيها ... خزرتلها هازة حاجب و مهبطة حاجب ... انت تحكي معايا انا .؟؟؟!!! .. ملا نحكي مع الحيط أيا تحرك معادش وقت عدم باهم لكليونات جاو ... قلتلها أول حاجة انا جاية نخدم لوجوه موش باش النظف القاعة و زيد بربي الكليونات كيسمعو الي انا يدي في السطل و الخيشة و بعد نشدلهم وجوهم اش باش يقولو ؟؟ يخسرو عليك كان حاجة اكهو ما عادش يجيوك خاطر استيتيسيان متاعك تخدم كل شي ..... زادت زرقنت كسمعتني نحكي هكاكا طربقت الباب و خرجت.... و قعدت التمتم وحدها الشي قوا عليها .... يا ميمتي ما كنتش نتصورها باش تحقد عليا بالطريقة هاذي على جرد 450د .... أيا سكت و عداها في بالي وفات لحكاية.... كملت النهار هذاكا و هي قلبت منضرها ما فماش ريحتها .... رتحت منها ليوم صبحت كالشيطان يا لطيف.... عديت ايامات و انا وياها مناش كالعادة نحكيو كان عالخدمة مستانسة تفدلك معايا و عاملين جو في السنتر زادت سمعت الي انا تخطبت و مانيش باش نعيش في تونس زادت هبلت ولات نهار الكل و هي طعيت عليا. ... عيطتلي نهار للبيرو قتلي اسمع سمعت بيك باش تعرس و تمشي تعيش في الخارج بعد ما لكليونات ستانسو بيك اش باش نعمل انا توة؟؟؟ قلتلها جيب وحدة أخرى تقعد معايا لين يستانسو بيها لكليونات .... قتلي باهي .... بعد بايامات جابت وحدة معايا ولينا حبيبات انا وياها هي زادا تباركالله عليها في الخدمة. .. للا عرفتي معادش يساعدها تخلص زوز كانت جايبة عليا الماء و انا ساكتة .. خممت مليح يلزم فاطمة تخرج وقتها حال الشتاء الخدمة موش ماشية بالقدا .... دورتها في مخها وجاتني قتلي ... بما أنكم زوز في الاستيتيك خلي صفاء تخدم و انت اطرز لقصايص ماني وريتك كيفاش. ... و انا الطرشقت عاد بطبيعتي نستنالها فيها. .. اسمع باش نقلك آخر كلمتين تسمعهم مني انت راك كثرتلها و انا قارية الشهر ب 200د باش نخدم صنعتي موش باش نطرزلك كان جيت حاشتي في الطريزة راني مشيت قريت خياطة ... و اسمعني مليح انا باش نهز صاكي و نمشي و رد بالك تتجرأ و تجي الدارنا سمعتني راني ما نرحمكش ؟؟! هزيت صاكي و خرجت و انا نرعش بكلي الهم هذي باش تركبلي السكر ... هي اصلا تستنى فيها

#الحلقة_11

و كالعادة روحت الدارنا أما وليت مرة في دارنا و كنقلق نمشي بحذا خواتي و بالطبيعة انا و ساجد نحكيو ديما قداه حبيتو و قداه تعلقت بيه قلبي ديما يرفرف عليه وليت نستنى وقتاش يعاود يرجعلي.... فما نهار حليت السكايب نحكيو قلي فطومتي باش نجي في الصيف نكتبو صداقنا..... تحكي بجدك ولا تفدلك أمان ساجد ما تلعبليش باعصابي و الترشقت بالبكاء.... شبيك فطومتي علاش بكيت انا نحكي بالرسمي في الصيف انشالله نجي .... و انا زدت قويت في البكاء لا عرفت من وحشتي ليه ولا مالفرحة موش فاهمة.... مسكين هو ولى يسكت فيا ... يا بنتي اسكت و قلي شبيك.... شي حبي خاطر توحشتك برشا حاسة روحي ناقصة حاجة الي هي انت كنشوف أي بنية مع خطيبها ولا مع صاحبها و لا راجلها نهبل انا نلقى روحي وحدي و انت تعرف ما عنديش أصحاب حتى صحبتي الي مالصغرة انا وياها عرست فديت راني معادش طايقة روحي و زيد حبك عمل فيا ..... ولى يضحك .... باهي فطومتي الغالية تو نجي و نشبعو بعضنا السعة انا فيبالي قتلك خبر يفرح ياخي قمتلي تبكي.... مسحت دموعي و قتلو أي والله فرحتني برشا اما فرحتي الكبيرة كيف نبدى معاك على طول في جنبك ما نفارقكش ولا لحظة. ... تيزي عاد فطومتي أصبر ياخي فيبالك انا مانيش ملهوف عليك أنت عالاقل هاك مع داركم أما أنا مطيش في الغربة لا مرا ولا صغار يونسوني باقي نصبر في روحي بيك كنحكي معاك في السكايب و نشوف اكالزين نتفرهد و ترجع فيا الروح يزي أمان عيش روحي ما تزيدش عليا والله كنشوفك هكا قلبي يذوب .... ضحكتلو و قتلو باهي اقلب علينا الموضوع. ... قلي باهي هات اكالضحكة المزيانة و بوسة معاها .... يزي احشم هههههههه

#الحلقة_12

تعداو الاشهرة في رمشت عين و بديت نحضر لصداقي عاملة جو الي نعملها نقول عليها الساجد ..حاجة برك يوصي عليها و يعاود فطومتي الروبة موش عريانة ... حقا انا ما قتلكمش قررت نعمل لعشية زداق وفي الليل ملاك .... ريقلت كل شي ونستنى في النهار الي يجي فيه ساجد قداه توحشتو المرة هذي باش نعنقو دوبة نشوفو في المطار ما يهمنيش في الناس ههههه.... أمي عملتلي كسكسي العولة لعشاء الزداق لمت النساء و زغاريت و ضحك و البخور يعجعج زادت حسستني بالفرحة ونتخيل في روحي انا لعروسة ما نحكلكمش على ساجد عاد يحسب في الوقت و كل نهار يتعدى يحسب قداه مزالو باش يشوفني شراء كوستيمو و شرالي انا دبش لملاك و زيد بعثلي فلوس قلي اشري بيهم الذهب. ... هبط انا و امي للبركة شريت شركة و زوز فرادي ذهب ابيض يعشقو ما افينهم وأمي عملتلي فضيخة قدام الناس كيفاش شريت الأبيض و هي تحب عالاصفر قتلي لعباد تو يقولو يلبس فيها في الفضة ههههه... أمي مالي و مال لعباد انا الي باش نلبسهم موش هوما .... قضينا قضياتنا و روحنا ..... بدأ الوقت يزرب و الايامات تتناطر وسجودة يحضر في روحو باش يهبط و انا نستنى وقتاش نلبس الروبة و نتصدر بجنب حبيبي .... من غدوة طيارتو توصل لعشية بت على نار النوم هرب من عنيا تقولش عليا اول مرة باش نقابلو .... قمت الصباح فرحانة و نخمم شنوة ناقصني نحب كيف يجي حبي يلقى كل شي حاضر مزالو خمسة أيام ونكتب زداقي .... شربت قهوتي خملت الدار حتى تعدى الوقت حضرت روحي لبست روب نوار طويلة مسنترا مع بدني و فوقها بلوزون دجين و سبادري و لميت شعري الفوق و شوي ماكياج خفيف و حطيت لوناتي و خرجت هههه جماعة الحومة ما عرفونيش فيبالهم ضيفة الي يتعدى يقعد يخزر و انا عاملة مولا الدار موش هنا ..... وصلت للمطار عاد المرة هذي نعرفو مليح منيش باش نضيع وقفت نستنى في حبيبي طيارتو وصلت عندها درج .... تباركالله تقول تونس الكل في المطار معبي بصيفة غريبة. ... انا هاكاكا شاردة و يد تحطت عليا تلفتت نلقاه سجودة .... سمالله العضيم منين طلعت ياخي هههههههه.... باسني و قلي وقت انت شاردة في العباد انا طلعت... عنقتو بالقوي ووشوشتلو في وذنيه ما يهمنيش في العباد هههههه. ... توحشتك يا مهبولة ... حتى انا برشا و هبطت دمعة من عنيا مالفرحة ..... مسحهالي و قلي هاني معاك عادا يزي ..... شديتو من يدو و كبست عليها .... أمان سجودة معادش تهرب عليا ... و مشينا كالعادة جابولو كرهبتو .... طلعنا قلي نمشيو نفطرو راني ما كليتش ماكلت الطيارة.... قتلو هيا .... في الكرهبة عدو باش ينقز عليا ..... انت شبيك لابسة هكا ليوم ياسر مغرية راك نحبك تلبس هكا كان ليا انا اكهو موش شعب تونس الكل يتفرج فيك .... عاد شبيه ياخي انا عريانة هاني لابسة كالعباد .... شوف حبي انت بدنك حلو برشا و الي تلبسو يواتيك و هكاكا يوليو يبزنسو فيك و انا ما يساعدنيش مرتي فرجة للعباد .....باهي معادش نلبس هكا .... شادلي يدي يبوس فيها و ضربة ثنين يخطف بوسة من خدي هههه... حتى لين وصلنا للمطعم ... فطرنا و بعد تعدينا عملنا قهوة وصلني الدارنا لقى كان امي سلم عليها و جايبلها كادو صاك يفتق عدني باش نفكهولها هههه و قال يلزمني نمشي أمي راهي نستنى فيا .....

#الحلقة_13

كملنا التحضيرات و بدى الخوف ماكلني خايفة لا تكون حاجة ناقصة و زيد نخمم كيفاش باش نطلع في الروبة ... أمي كشافتني هكاكا قتلي بري ارقدي شوية ارتاحي غدوة عنا نهار طويل ..... الحق مشيت التكيت و النوم شي هرب عليا جملة حتى غمضة لصباح و انا كل مرة نتفكر حاجة نقوم نتفقدها نسمع في امي تقربع في الكوجينة مشيتلها .... صباح الخير امي .... صباح الخير فطومة ياخي شبيكي عالصباح فايقة متقوليليش مرقتيش جملة .... طار عليا النوم أمي ما نجمتش .... حضرنا قهوة فطرت و بديت عاد نحضر على بكري عبيت لحلو في الاطبقة و خلطنا الروزاتا و العصير نحب كل شي نعملو وحدي ما نحب نعمل على حد باش باش مبعد ما يركبنيش العصب .... سجودة طلبني عالصباح مشى للحمام ههههه عروس .... قلي فطومتي مزالو سويعات و تولي مرتي راك معناها عندي الحق نعمل كل شي هههه... لالا بابا قلك حتى لين نعرسو ليوم زداق اكهو ههههه و انا نسمع كلام بابا ههههه ...شاخ بالضحك قلي باهي تو نشوفو ..... مشيت جبت روبتي و القفطان متع الزداق و قديت ضوافري فرانش ونسمع في الطباخة جات امي حضرتلها كل شي خواتي الأولاد جابو الكراسي و الطواول والمنصة احنا وسط دار متاعنا كبير برشا فيه جنينة محلاها الكلها ورد قلت نعمل ملاكي في الدار خير من صالة حتى ساجد عجبتو الفكرة .... بدى الوقت يقرب و انا داخلة بعضي حضرت روحي ماكياج خفيف لبست قفطاني طلعت محلاني وسط الدار تعبى بالعباد و نسمع في الزمامر الجماعة جاو اكهو كتبنا الزداق و الزغاريت و امي تبكي ههههه انا الدمعة ما حبتش تهبط مالفرحةهههههه تعشاو العباد الكل ماكلة بنينة عالخر تعدات عشوية تهبل ساجد روح باش يلبس كوستيمو و يجي للسهرية انا مانيش ماشية للحجامة باش نقد ماكياجي وحدي دخلت البيتي ما خليت حد يدخل معايا عملت ماكياج يقتل و عملت لمة في شعري و تاج مضخم و فينو و لبست الروبة سيران تهبل جاتني تقتل انا بيدي ما عقلتش روحي ههههه امي الدق في الباب و تعاود يا فطومة كملتيش العباد الكل جو حتى ساجد جا .... باهي يامي هاني قريب ... دوبة طليت مالشباك ... تباركالله تي هاو جماعة الحومة الكل تصدرو هنا.... قلبي بدى يدق انا لعروسة و هذوكم المتفرجين هههه..... أمي تضبضب البرة يا بنتي باش تخرجي نص الليل .... حليتلها الباب شافتني و بدأت تصلي عالنبي و الدموع تسكسك هههههه خرجتني دوبة خرجت الناس الكل تلفتو مرت عمي قتلي محلاك كالباربي ههه ....ساجد موش مصدق جاني شدني من يدي و طلعنى تصدرنا والعباد حلين الفامهم هههه هو زادة تباركالله عليه وهرة فيه مشالله بارفانتو قهرتني وشوشلي .... مافيبالبش عروستي باش تطلع poupee ههههه تمنينا كان جات ليلة عرسنا هذيك شخنا شطحنا تقول عرس موش ملاك و تقول حاسة الي انا معادش باش نلبس روبة عروسة ...... المصور فرخ يركح فيا هههه جبدلي وردة حمرا مالبوكي و عطاهالي زعمة زعمة باش نصور باها ههههه و ساجد فادد عليه ههههه حصيلو تعدات ليلة و لا في الأحلام ... يا ربي مصاب نروح معاه و ينحلي هو الروبة .... و هو زادة نحس من عينيه نفس الشي حب موش عادي ....

#الحلقة_14

وفات الليلة هذيك و انا سايي وليت على ذمة راجل عروسة مع وقف التنفيذ هههههه... ساجد قعد جمعة بعد العرس عديناها كل مع بعضنا و باقي ما شبعتش منو معايا و متوحشتو مخليتوش يمسني هههه الله و اعلم عالمكتوب. ..... تو كل شي يجي في وقتو .... روح ساجد و رجعت حليمة إلى عادتها القديمة ... ديراكت بديت في اوراقي باش ما نخسرش الوقت ... سي ساجد طلعلي بطلعة قال شنوة معادش يساعدني تلبس هكاكا في الشارع .. قلي شبيني طرطور انا نفرج العباد في مرتي انت متاعي انا اكهو و بصراحة جيتي لخرى شفت برشا حاجات شديت روحي بسيف باش ما نعملش عركة راك معايا و يخزرولك و انا ناري شاعلة .... انا نسمع و نتلف و قداه من مرة جبدهولي الموضوع هذا و انا نقلو تو ربي يهديني و بدا عركنا ولينا معادش متفاهمين ولى يهلوس حتى كنخرج للعطار .... ولينا نتعاركو برشا والحكاية وصلت الامي و بطبيعة امي جات في صفو ... نهار الكل يا بنيتي اسمعي كلام راجلك راكي كتابة زداقك تو .... و انا الحق نحبو ما نجمش نرفضلو طلب اما في هذي بصراحة كثرلها .... حضرت الأوراق الكل و باقي كان السفارة و يلزم هو يجي خاطر فما أوراق يلزم يجيبهم و زيد الموعد في السفارة عملو هو بالإنترنت باسمو .... قلي اسمع ما تجي و تعيش معايا إلا ما تدين .... يقلك هذي باش تجيني لهنا عريانة و بالستيل هذاكا تو يغرها بدنها و لبستها و تهرب هههههههه مسكين هذيك نيتو هو. ... قتلو انا لا ما ندينش تو وقت يهديني ربي ما يشدني حد على الخمار .... و تعاركنا عركة كبيرة و قلي انت ملول متحبش تسمع لكلام ملا مبعد كيفاش تعرفش كيفاش اقعد مع كسوحية راسك انا معادش حاشتي بيك و سكر السكايب .... وأنا ما صدقتش باقية مبهمة ....يحكي بجدو هذا ياخي ؟؟!! عدينا جمعة متعاركين لا كلمني لا كلمتو .... و انا يوميا في البروفيل متاعو نتفقد فيه وقتاش يحل الفيسبوك و هو شي الريحة و النسمة .... زادت تعدات الجمعة الثانية وليت كالمهبولة توحشت صوتو معادش النجم نصبر يا ربي اش باش نعمل تو هاو طلع يحكي بالحق.... نهار الكل و انا نبكي و نخمم اش باش نعمل دارنا ما سمعوش ... قلت غدوة نمشي الامو ..... طلع النهار مشيت الدارهم نلقى امو وحدها فرحت بيا و انا شدني لبكاء و هي كشافتني هكاكا تفجعت .... تمسحلي في دموعي ... شبي بنيتي تبكي اش صار .... ساجد قلي كل واحد على روحو خاطر ما حبيتش ندين ... وه ساجد ولدي يعمل هكا والله ما نوريك فيه .... كلمتو بالوقت سمعتو لكلام قتلو سيب الطفلة على راحتها بالسيف تحبها تدين أيا يزي بلا تزعبين تو النحيلك والديك هههه... و هو نسمع فيه يضحك في التاليفون ... باهي امي. ... هي طريقة كلامها تضحك هههه اكهو فطرت حذاها و روحت انا وصلت وهو بعثلي ميساج ... توحشتك حل السكايب ..... رجعت فيا الروح والله كنت نحساب روحي سايي وفيت مع ساجد .... رجعنا نحكيو كالعادة .... قتلو خليني على راحتي و انا نوعدك تشوف مني حاجة باهية ... قلي باهي تو نشوفو. ....

#الحلقة_15

قرب موعد السفارة و ساجد جا التونس اول ما جا جاني الدارنا خاطرني مريضة بالبرودة و السخانة تقلي فيا ..... قعد حذايا شوية و مشا .... قلي غدوة يلزمك تفيق بكري تو نجي نهزك قتلو باهي ... فقت الصباح بالسيف الخشم مسكر و العطسة ورا أختها و الصوت ما فماش ... يا ناري كيفاش باش نتكلم في السفارة .... حضرت روحي و الفشلة هابطة عليا موش حاليلي شي .... جا ساجد قتلو امي اقعد اشرب قهوة ..... لا معادش وقت يلزمنا نمشيو تو لعشية نجي نشرب كأس تاي... حصيلو مشينا و في الثنية تعدينا للفارماسي عملت زريقة متع السخانة و خذيت دوا على قراجمي رجع صوتي شوية وهو كل شوية يحط يدو يشوفلي السخانة ... وصلنا للسفارة نلقاو صف وقفنا مع الناس و انا خايفة يدي على قلبي ... سجودة زعمة يقبلوني ما يروفزونيش ..... ما تخافش عزيزتي الأمور الكل مريقلة يقبلوك انشالله موش انا اول واحد ولا آخر واحد باش نجيب مرتي اصحابي الكل جابو نساهم ... دخلنا الداخل جا دوري عيطولي دخلت للكابيني عطيت أوراقي و سألني سؤالات جاوبتو و قلي اكهو تو نكلموك ... خرجنا ...ساجد قلي تحب نعملو قهوة قتلو والله منجم واقفة بالقدرة هيا نروحو تو امي تعمللنا قهوة روحنا و هو إكا حدو عليا ... فطومة هيا نهزك للطبيب. .. لا لا خلي اتو نرتاح هاني شربت الدواء.... هو جا على 4 ايام و راجع انا ما تلهيت بيه كان النهار لخر خرجت معاه .... رجع و انا قعدت وحيدة .... بعد بثلاثة جمعات كلموه هو في سويسرا قلولو راهي مرتك مقدمة أوراقها جيب انت اوراقك و ايجا مشا ريقل امورو ....و قلي تو نهارين و يكلموك يقولولك اجا خوذ الفيزا..... و كيما قلي هو نهارين و كلموني عالصباح قلولي اجا غدوة و جيب الاسيرونس متاعك و خوذ الفيزا. ... هههه والله ما صدقتها و أخيرا ربي باش يلم شملنا انا و راجلي الحمد ليك يا ربي .... مشيت هزيت باسبوري طبعولي فيه فيزا ب 3 اشهرة معناها يلزمنا فيسع نعرسو خير ما يوفى وقت الفيزا و ترصيلي نعاود ماللول. .... اكهو حضرنا روحنا ساجد بعثلي فلوس قلي ريقل انت كل شي انا راني كالعادة باش نجي 6 أيام اكهو عالخدمة. ... ريقلت اموري صالة حلو روبة عوادة حضرت كل شي فرحانة عالخر نتخيل في روحي عروسة و نودع في دارنا ... هو قصلي تسكرتي معاه .... من غدوة يجي هو خواتو حضرولو كل شي ملازم الحنة .... و انا من غدوة حمامي مشينا الناس الكل زغاريد و بخور و دربوكة و كراهب تزمر ..... و في ليلتها بديت حنتي الفاميليا الكل جاو عاملين جو ...عمل ساجد الحنة متاعو و يا فرحة ما تمت عندو خوه يعيش في ليبيا ما حضرش للعرس ليلة حنة ساجد خوه هذا توفى بسكتة قلبية ..... الخبر زعزع عيلة راجلي و انا قعدت نندب على سعدي فرحة عمري ضاعت مني نهارت عرسي نبكي و النوح حنتي في يدي نصب عليها في الجفال ... يا ربي علاش حرمتني من فرحتي با ربي راني ما فرحتش كيما لعباد و النساء يسكتو فيا عيش بنتي هذاك الي كاتب امي مسكينة تحمل فيا و تبكي..... الروبة الي نحلم بيها طول عمري باش ينحيهالي راجلي لا لبستها و لا تمتعت بيها ..... بكيت بكيت حتى لين دخت فقت بروحي كان في الطبيب عملي زريقة و قلي يلزمك ترتاح مدام راك ماخذة صدمة كبيرة... روحو بيا و امي و بابا مشاو الدار ساجد باش يعزيو ... ساجد كسمع بيا جاني طاير عجاجة يحمل فيا و يبكي مسكين يا ويلو من خوه و يا ويلو من ليلة فرحتو ....

#الحلقة_16

بعد بنهار وصل خوه للدار في قفن مساكن ملي كانت دار عرس و زغاريد ولات دار ميت و بكاء و نويح.... دفنوه... ساجد مزالو نهار اكهو زاد مشى زاد ايامت و بدل التساكر ... انا الحزن ماليلي عنيا مالدار ما خرجتش ساعات يجيني ساجد يطل عليا .. تعداو ليامات دفنو خوهم و جا نهار الي باش نخرج فيه من دارنا عائشة اختي لمتلي فاليزاتي انا نتفرج و ساكتة قلبي موجوع على ليلة عمري الي تعدات و ما فرحتش فيها كالعباد نستنى فيها عندي سنين كنت باش نعمل فيها مفاجئة الساجد حضرت لبسة التديين و كنت باش نلبس الخمار ليلة عرسي باش تولي الفرحة فرحتين ياخي الحزن سبق الفرحة تقلب كل شي..... بايتة ليلة كاملة معنقة امي و اختي و الدموع شلال .. أول مرة باش نفارقهم ... بابا الحزن ماليلو قلبو اما موش مضهر تشوف في عنيه الدموع سهرية كاملة وين نتلفتلو نلقاه يخزرلي خزرة الحزن خواتي لولاد يبكيو اول مرة نشوفهم هكاكة و انا كينشوفهم هكاكا يزيد قلبي يوجعني حتى وصلت نقول انا شعملت في روحي كيفاش باش النجم الغربة و عايلتي بعاد عليا يا ربي قويني راني متوكلة عليك .... للصباح عيني ما شفتش النوم نخزر الكل تركينة في دارنا حملت مخدتي و بكيت لين تقطع عليا النفس موش طايقة فراقهم .... قامو الناس الكل جا ساجد اكهو حان موعد الفراق معادش باش نقوم الصباح نصبح على امي و بابا معادش باش نحضن امي و نبوسها باش نولي في في حضن راجل غريب .... هزيت فاليزاتي و خرجت و بدى البكاء عاد حتى بابا شد شد روحو و الطرشق بالبكاء انا نبكي بالصوت يعنقو فيا ويبكيو حتى ساجد ضهر قلبو معبي يجبد فيا و يبكي .... هيا معادش وقت عالطيارة .... ودعتهم وخليت قلبي عندهم مشيت جهامة والله .... ركبت في الكرهبة شيعوني بعينيهم أمي بزعت ورايا الماء..... ثنية كاملة و انا نبكي حتى وصلت للمطار عدينا فاليزاتنا و دخلنا عقدنا ستنينا شوية و خرجنا للطيارة طلعنا ركحنا رواحنا شدينا بلايصنا و انا نتأمل في الطيارة اول مرة نشوفها كنت ديما نشوفها كان في التلفزة .... بدات الطيارة خارجة بشوية و انا نتفرج مالشباك نودع في تونس الخضراء بلادي لحنينة خليت فيها اغلا ناس عندي إحساس منجمش نوصفو وقت تخلي بلادك و تمشي تعيش في بلاد غريبة لا أهل لا أصحاب .... طلعت الطيارة في السحاب و انا نخزر مالشباك تونس ماشية و تغيب على عيني تفكرت امي كينو واحد خاطفني و انا خايفة قلبي يدق باش يخرج من بلاصتو .... ساجد عنقني و تكاني على كتفو ... هزني النوم .... قمت جعانة عالخر جابولنا الماكلة فطرت و عاودت رجعت رقدت ... فقت كان على صوت ساجد فطومتي قوم رانا وصلنا حليت عنيا نلقى روحي في بلاد أخرى الثلج يصب و الدنيا باردة جبدت كبوطي مالصاك هبطت يا ميمتي ما بردها .... فطومتي لف على روحك بالقدا. ... خرجنا لقينا خالي يستنى فينا مشيت نجري عنقتو و نبكي .... و هو يسكت فيا .... باهي فطومة يزي تو هاك مع خالك ما تخافش ..... طلعنا في الكرهبة وصلنا خالي الدارنا طلعت للدار ههه دار عروسة والله عبارة منضمينها نساء تباركالله محلاها مشرها و كل حاجة في بلاصتها اما صدقوني موش كيما دار البو. ... دخلت ديراكت التكيت و ساجد خليتو يشوف في جوابات وصلوه. ... هزني النوم لين وليت نشخر مالتعب .... عديتها عشية كاملة راقدة ... ساجد كلم امي طمنها الي احنا وصلنا لباس. ... حضر عشاء عرايس ... ممممم ماكلتو ياسر بنينة .. تعشينا فدلكنا شوية جا حملني و هزني بيت النوم هههه و من بوسة صار الي صار هههههه. ... عديت احلا ايامات حياتي نسيت فيهم النكد متع العرس اما هذا الكل حسيتو كان مبعد بجمعة و انا في سويسرا الجمعة لولة في غيبوبة موش فاهمة شي نطل مشباك نشوف عالم غريب و ناس أخرى نرجع نجري هههههه .... راجلي نساني في الغربة عيشني احلا لحضات حياتي .... صحيح فما عرك كيما كل زوز معرسين جدد.... أما كل عركة نزيد نحبو أكثر. .. حنين عليا برشا ما يحملش فيا دقة الشوكة كي يعاركني يخرج ساعة و يرجع يصالحني و يخرجني نحوسو .... الي نطلب عليها تجيني موفرلي كل شي عملي صالون نخدم تباركالله حمدالله يا ربي فتحها في وجهي....عندي بنوتة و وليد مالين عليا الدنيا وليت ديما نهبط التونس نطل على دارنا و ديما نحكي انا وياهم سكايب ..... حمدالله ياربي متهنية لباس عليا كنت خايفة مالغربة اما راجلي نساني فيها .... فالاخر ديما نقول هذاك المكتوب ..... و زيد نحب نقول للبنات ما تزربوش على قسمكم الي مكتوب على الجبين لازم تراه العين